રાજકોટ ડિવિઝન દ્વારા 16મી સપ્ટેમ્બરથી 2જી ઓક્ટોબર, 2022 દરમિયાન “સ્વચ્છતા પખવાડા”ની ઉજવણી કરવામાં આવી રહી છે. આ પખવાડિયા દરમિયાન રેલ પરિસરને સુંદર બનાવવા માટે સ્વચ્છતાને લગતી વિવિધ પ્રવૃત્તિઓ સતત કરવામાં આવી રહી છે. રાજકોટ ડિવિઝનના સિનિયર ડીસીએમ અભિનવ જેફના જણાવ્યા અનુસાર સ્વચ્છતા પખવાડાના 12મા દિવસે સ્વચ્છ પેન્ટ્રી કાર/કેન્ટીન ડે પર ડિવિઝનના વિવિધ સ્ટેશનો પરના કેટરિંગ સ્ટોલ અને ટ્રેનોની પેન્ટ્રી કારમાંથી ખાદ્યપદાર્થોના નમૂના લઈને ગુણવત્તાની ચકાસણી કરવામાં આવી હતી. આ પ્રસંગે રાજકોટ ડિવિઝન ના વાણિજ્ય નિરીક્ષક વિશાલ ભટ્ટ અને ચંદ્રસિંહ ઝાલાએ ટ્રેન નં. 12476 માતા વૈષ્ણોદેવી કટરા-હાપા સુપરફાસ્ટ એક્સપ્રેસ અને ટ્રેન નં. 19270 મુઝફ્ફરપુર-પોરબંદર એક્સપ્રેસની પેન્ટ્રી કારનું નિરીક્ષણ કર્યું હતું. મુસાફરોને સારો સામાન આપવામાં આવી રહ્યો છે તેની ખાતરી કરવા માટે તેઓએ ખાદ્યપદાર્થોના નમૂનાઓ, ઠંડા પીણા, બિસ્કિટ અને અન્ય ખાદ્યપદાર્થોની ચકાસણી કરી. આ સાથે ખાદ્યપદાર્થો બનાવવામાં વપરાતી તમામ ચીજવસ્તુઓની ચકાસણી કરવામાં આવી હતી. રાજકોટ રેલવે ડિવિઝન ના અધિકારીઓ અને સુપરવાઈઝરોએ રેલવે સ્ટેશનોના કેટરીંગ સ્ટોલ પર ઉપલબ્ધ ખાદ્ય ચીજવસ્તુઓની ગુણવત્તા, વિક્રેતાનું તબીબી પ્રમાણપત્ર, ફૂડ લાયસન્સ, યુનિફોર્મ, નેમ પ્લેટ, રેટ લિસ્ટ અને સ્વચ્છતા વગેરેની ચકાસણી કરી હતી.
