એન્ફોર્સમેન્ટ ડિરેક્ટોરેટે શનિવારે કહ્યું કે તેણે Xiaomi ટેકનોલોજી ઈન્ડિયા પ્રાઈવેટ લિમિટેડના 5,551.27 કરોડ રૂપિયા જપ્ત કર્યા છે. આ કાર્યવાહી ફોરેન એક્સચેન્જ મેનેજમેન્ટ એક્ટ 1999ની જોગવાઈઓ હેઠળ કરવામાં આવી છે. તપાસ એજન્સીએ જણાવ્યું હતું કે આ નાણા ચીનની સ્માર્ટફોન કંપનીના બેંક ખાતામાં હતા અને તેને જપ્ત કરી લેવામાં આવ્યા છે.
સમાચાર એજન્સી રોઇટર્સેના અહેવાલ મુજબ આ મહિનાની શરૂઆતમાં, એ બહાર આવ્યું હતું કે એજન્સીએ Xiaomi કોર્પોરેશનના ભૂતપૂર્વ ભારતીય વડાને તપાસ હેઠળ તે નક્કી કરવા માટે બોલાવ્યા હતા કે કંપનીની વ્યવસાય પદ્ધતિઓ ભારતીય વિદેશી વિનિમય કાયદાઓ સાથે સુસંગત છે કે કેમ. ED બે મહિનાથી વધુ સમયથી કંપનીની તપાસ કરી રહી છે. આ સંદર્ભમાં એજન્સીએ ભારતના ભૂતપૂર્વ મેનેજિંગ ડિરેક્ટર મનુ કુમાર જૈનને પૂછપરછ માટે હાજર થવા જણાવ્યું હતું. જોકે, જૈન કે એજન્સીએ આ અંગે કોઈ ટિપ્પણી કરી નથી.
Xiaomiએ રોઇટર્સને જણાવ્યું હતું કે કંપની તમામ ભારતીય કાયદાઓનું પાલન કરે છે અને “સંપૂર્ણપણે સુસંગત” છે. “અમે અધિકારીઓને તેમની પાસે તમામ જરૂરી માહિતી છે તેની ખાતરી કરવા માટે તેમની ચાલુ તપાસમાં સહકાર આપી રહ્યા છીએ.”
રોઇટર્સના અહેવાલ મુજબ, ED Xiaomi India, કોન્ટ્રાક્ટ ઉત્પાદકો અને ચીનમાં પેરેન્ટ એન્ટિટી વચ્ચેના વર્તમાન વ્યવસાય માળખાની તપાસ કરી રહી છે. એક સૂત્રએ જણાવ્યું હતું કે Xiaomi India અને તેના પેરેન્ટ યુનિટ વચ્ચે રોયલ્ટીની ચૂકવણી સહિતના ભંડોળના પ્રવાહની તપાસ કરવામાં આવી રહી છે. ભારતીય સ્માર્ટ ફોન માર્કેટમાં Xiaomiનો હિસ્સો 24% છે. આ સાથે, Xiaomi વર્ષ 2021માં ભારતમાં સૌથી વધુ વેચાતો સ્માર્ટફોન પણ છે.
