સ્થાનિક પોલીસની કામગીરી સાથે વિશેષ વિંગ પણ સક્રિય રહેશે
હાલમાં નશીલા પદાર્થો સંબંધિત ગુનાઓ સામે LCB, SOG અને સ્થાનિક પોલીસની ટીમો કાર્યવાહી કરે છે. હવે આ કામગીરીને વધુ મજબૂત બનાવવા માટે અલગથી ANW યુનિટ્સ પણ કાર્યરત થશે. ગુજરાત પોલીસે છેલ્લા પાંચ વર્ષમાં NDPS એક્ટ હેઠળ 3,700થી વધુ ગુના નોંધી 5,346 આરોપીઓની ધરપકડ કરી છે. આ સમયગાળા દરમિયાન રૂ.13,600 કરોડથી વધુ કિંમતનો 1.36 લાખ કિલોગ્રામથી વધુ ડ્રગ્સનો જથ્થો જપ્ત કરવામાં આવ્યો હોવાનું જણાવાયું છે.
ANWનું માળખું અને કામગીરી
દરેક ANW યુનિટમાં એક પોલીસ ઇન્સ્પેક્ટર, એક પોલીસ સબ-ઇન્સ્પેક્ટર, બે ASI/હેડ કોન્સ્ટેબલ અને ચાર પોલીસ કોન્સ્ટેબલ સહિત કુલ આઠ અધિકારી-કર્મચારીઓ રહેશે. ટીમને અલગ વાહન અને ડ્રાઇવર પણ ફાળવવામાં આવશે.
જિલ્લા કક્ષાએ યુનિટ પોલીસ અધિક્ષકના સીધા સુપરવિઝન હેઠળ કાર્ય કરશે. જ્યારે અમદાવાદ શહેરમાં બે, સુરત શહેરમાં બે, વડોદરા શહેરમાં એક અને રાજકોટ શહેરમાં એક યુનિટ જોઈન્ટ/એડિશનલ સીપીના સુપરવિઝન હેઠળ કામ કરશે.
ANW દ્વારા ANTF દ્વારા સૂચિત ડ્રગ્સ પેડલરો અને હોટસ્પોટ્સ પર સતત નજર રાખવામાં આવશે. ડ્રગ્સના રીઢા ગુનેગારો સામે PIT-NDPS હેઠળ અટકાયતી પગલાં ભરવા CID ક્રાઇમને દરખાસ્ત પણ મોકલવામાં આવશે.
સ્થાનિક પોલીસની બેદરકારી સામે કડક કાર્યવાહી
ANWની રચના બાદ પણ સ્થાનિક પોલીસ સ્ટેશનોને NDPS કેસો શોધવાના રહેશે. ANWની તપાસ દરમિયાન સ્થાનિક પોલીસની નિષ્કાળજી કે બેદરકારી જણાશે તો સંબંધિત કર્મચારીઓ સામે કડક શિક્ષાત્મક કાર્યવાહી કરવામાં આવશે.
ડ્રગ્સ સામે ગુજરાતની વિશેષ પહેલ
ગુજરાત પોલીસે ડ્રગ નેટવર્ક સામેની કાર્યવાહી માટે ‘ડ્રગ રિવોર્ડ પોલિસી’ અને જીવના જોખમે કામગીરી કરનાર જવાનો માટે ‘આઉટ-ઓફ-ટર્ન પ્રમોશન’ નીતિ અમલમાં મૂકી છે.
આ ઉપરાંત ડાર્ક વેબ, ફાઇનાન્સિયલ ટ્રેઇલ અને આંતરરાષ્ટ્રીય કનેક્શન્સ શોધવા માટે AI આધારિત ‘NARIT’ સોફ્ટવેરનો ઉપયોગ કરવામાં આવી રહ્યો છે. વૈજ્ઞાનિક તપાસ દ્વારા કોર્ટમાં કન્વિક્શન રેટ વધારવાનો પણ પ્રયાસ કરવામાં આવી રહ્યો છે.
ડ્રગ્સ સામે કડક કાર્યવાહી સાથે નશાના ભોગ બનેલા યુવાનો માટે સંવેદનશીલ અભિગમ અપનાવી રાજ્યભરના વ્યસનમુક્તિ કેન્દ્રોને આધુનિક બનાવવા, યોગ્ય કાઉન્સેલિંગ અને સારવાર પૂરી પાડવા પર પણ ભાર મૂકવામાં આવી રહ્યો છે.
