ગુજરાતના બોટાદ જિલ્લાના રોજીદ ગામમાં ઝેરી દારૂ પીવાથી ઓછામાં ઓછા 18 લોકોના મોત થયા છે, જ્યારે 47 અન્ય લોકો બીમાર પડ્યા છે અને તેમને સારવાર માટે ભાવનગરની સિવિલ હોસ્પિટલમાં દાખલ કરવામાં આવ્યા છે. એક વરિષ્ઠ પોલીસ અધિકારીએ સોમવારે રાત્રે કહ્યું કે કેટલાક દર્દીઓની હાલત ગંભીર છે. પોલીસે કેટલાક લોકોને કસ્ટડીમાં લીધા છે. ગુજરાત એન્ટી ટેરરિઝમ સ્ક્વોડ (ATS) અને અમદાવાદ ક્રાઈમ બ્રાન્ચ પણ તપાસમાં જોડાઈ છે.
ડીજીપીનું નિવેદન: ગુજરાતના પોલીસ મહાનિર્દેશક (ડીજીપી) આશિષ ભાટિયાએ જણાવ્યું કે સવારે બે લોકોના મોત થયા હતા. જ્યારે પાંચ અન્ય લોકોના સારવાર દરમિયાન મોત થયા હતા. અધિકારીઓએ સોમવારે મોડી રાત્રે જણાવ્યું કે સારવાર દરમિયાન વધુ ત્રણ લોકોના મોત થયા છે. બોટાદના પોલીસ અધિક્ષક કરણરાજ વાઘેલાએ સોમવારે મોડી રાત્રે પત્રકારોને જણાવ્યું હતું કે અમારી માહિતી મુજબ અત્યાર સુધીમાં 18 લોકોના મોત થયા છે. ઓછામાં ઓછા 47 લોકોની વિવિધ હોસ્પિટલમાં સારવાર ચાલી રહી છે, જેમાંથી મોટાભાગના ભાવનગરની સર તખ્તસિંહજી હોસ્પિટલમાં દાખલ છે. જેમાંથી કેટલાકની હાલત ગંભીર છે.
ATS ની ટીમ પહોંચી: અકસ્માત મોતનો કેસ નોંધવામાં આવ્યો છે અને કેટલાક લોકોની પૂછપરછ માટે અટકાયત કરવામાં આવી છે. વાઘેલાએ કહ્યું કે, જરૂર પડશે તો પોલીસ હત્યાનો ગુનો પણ ઉમેરશે. ગુનેગારોને પકડવા માટે ગુજરાત ATSની સાથે અમદાવાદ ક્રાઈમ બ્રાન્ચ પણ અમારી તપાસમાં જોડાઈ છે. ભાટિયાએ જણાવ્યું હતું કે પોલીસે બોટાદ જિલ્લામાંથી ત્રણ દારૂના દાણચોરોની અટકાયત કરી છે, જેઓ ગેરકાયદેસર દેશી દારૂનું વેચાણ કરતા હતા.
