ગાંધીનગર, સોમવાર
દેશની રાજ્ય સરકારો કેન્દ્રશાસિત પ્રદેશો અને રિજીયોનલ સ્પોર્ટસ બોર્ડની ટીમના કર્મયોગી-અધિકારીઓ માટે યોજાતી વિવિધ રમત-ગમત સ્પર્ધાઓ અંતર્ગત ઓલ ઇન્ડિયા સિવિલ સર્વિસીસ સ્વીમીંગ ટૂર્નામેન્ટ-2021 – 22 -ગુજરાતના યજમાન પદે ત્રણ દિવસ માટે ગાંધીનગરમાં યોજાશે. ગુજરાતના 24 તૈરાક કર્મયોગી ભાઇ-બહેનો સહિત આ સ્પર્ધામાં દેશના 12 રાજ્યો, બે કેન્દ્રશાસિત પ્રદેશ અને 6 રિજીયોનલ સ્પોર્ટસ બોર્ડના 296 સ્વીમર્સ પોતાનું તરણ કૌશલ્ય દર્શાવશે.
રાજ્ય સરકારના સામાન્ય વહીવટ વિભાગ-જી.એ.ડી ની કલ્યાણ શાખા દ્વારા સહ આયોજિત આ સ્પર્ધાનો પ્રારંભ મુખ્ય સચિવ પંકજકુમાર મંગળવાર તા. 21 ડિસેમ્બરે સવારે 10.30 વાગ્યે સચિવાલય જીમખાના સેક્ટર-21ના સ્વીમીંગ પુલ ખાતે કરાવવાના છે. કેન્દ્ર સરકારના સેન્ટ્રલ સિવિલ સર્વિસીસ કલ્ચરલ એન્ડ સ્પોર્ટસ બોર્ડ, નવી દિલ્હીના સહયોગ માર્ગદર્શનમાં આ સ્પર્ધા મંગળવાર તા.21 થી ત્રણ દિવસ માટે યોજાઇ રહી છે. આ સ્પર્ધાના પ્રારંભ અવસરે સામાન્ય વહીવટ વિભાગના અધિક મુખ્ય સચિવ શ્રી એ. કે. રાકેશ તથા માર્ગ મકાન સચિવ સંદીપ વસાવા પણ ઉપસ્થિત રહેશે. આ સ્પર્ધાનું ટેકનિકલ સંચાલન ગુજરાત સ્ટેટ સ્વીમીંગ એસોશિએશન દ્વારા કરવામાં આવશે.
