ગુજરાત રાજ્યમાં કૃષિ ક્ષેત્રે એક નવી ક્રાંતિ લાવવાના હેતુથી આજથી રાજ્યવ્યાપી ‘ખેત બચાવો અભિયાન’નો ભવ્ય પ્રારંભ કરવામાં આવ્યો છે. ગાંધીનગર જિલ્લાના શેરથા ગામ ખાતેથી કૃષિ મંત્રી જીતુભાઈ વાઘાણીએ આ અભિયાન લીલી ઝંડી આપીને ખુલ્લું મૂક્યું હતું. આગામી એક મહિના સુધી એટલે કે તા. ૧ થી ૩૦ જૂન, ૨૦૨૬ દરમિયાન ચાલનારા આ વિશેષ અભિયાન અંતર્ગત રાજ્યભરના કૃષિ વૈજ્ઞાનિકો, કૃષિ વિભાગના ઉચ્ચ અધિકારીઓ અને કર્મચારીઓની ટીમો ગામે-ગામ જઈને ખેડૂતો તેમજ પશુપાલકોને રૂબરૂ મળી વિગતવાર માર્ગદર્શન પૂરું પાડશે.
આ પ્રસંગે વિશાળ સંખ્યામાં ઉપસ્થિત ખેડૂતો અને પશુપાલકોની મેદનીને સંબોધતા કૃષિ મંત્રી જીતુભાઈ વાઘાણીએ ભાવુક અપીલ કરતા જણાવ્યું હતું કે, “ખેતી એ માત્ર આપણી આજીવિકા નથી, પરંતુ આપણા પૂર્વજોનો પવિત્ર વારસો અને આપણો આત્મા છે. જો આજે આપણે રાસાયણિક ખાતરો અને જંતુનાશકોના અતિશય વપરાશથી આપણી ખેતીની જમીનને બચાવવા માટે જાગૃત નહીં થઈએ, તો આવતીકાલે સમગ્ર માનવજાતનું અસ્તિત્વ પણ જોખમમાં મુકાઈ જશે.” તેમણે જમીનની ફળદ્રુપતા જાળવવા અને પર્યાવરણના રક્ષણ માટે પ્રાકૃતિક ખેતી તરફ વળવા ભાર મૂક્યો હતો.
પ્રાકૃતિક કૃષિ (Natural Farming) કરતા ખેડૂતોને તેમના પાકના યોગ્ય અને પોષણક્ષમ ભાવો મળી રહે તે માટે સરકારે મહત્વનો નિર્ણય કર્યો છે. કૃષિ મંત્રીએ જાહેરાત કરી હતી કે, રાજ્યમાં પ્રાકૃતિક ખેતીને વધુ વેગ આપવા માટે આગામી સમયમાં તમામ મુખ્ય સરકારી કચેરીઓ, જિલ્લા કલેક્ટર કચેરીઓ અને વિવિધ સહકારી મંડળીઓમાં પ્રાકૃતિક ખેતીના ઉત્પાદનો માટે વિશેષ વેચાણ કેન્દ્રો (આઉટલેટ્સ) શરૂ કરવામાં આવશે. જેથી ગ્રાહકોને સીધું શુદ્ધ અનાજ-શાકભાજી મળી રહે અને ખેડૂતો આર્થિક રીતે સદ્ધર બને.
આ ગરિમામય કાર્યક્રમ દરમિયાન કૃષિ મંત્રીના હસ્તે ખેડૂત હિતલક્ષી યોજનાઓ અંતર્ગત વિવિધ લાભોનું વિતરણ કરવામાં આવ્યું હતું:
-
પાક સંગ્રહ યોજના: પ્રગતિશીલ ખેડૂતોને ‘મુખ્યમંત્રી પાક સંગ્રહ સ્ટ્રક્ચર યોજના’ના મંજૂરી પત્રો અને સહાયના લાભો એનાયત કરાયા હતા.
-
ખેડૂતોનું બહુમાન: રાસાયણિક મુક્ત ખેતી કરતા સ્થાનીક પ્રાકૃતિક ખેડૂતોને સ્ટેજ પર શાલ ઓઢાડી તેમજ પ્રશસ્તિપત્ર આપીને વિશેષ સન્માનિત કરવામાં આવ્યા હતા.
આ અભિયાન અંતર્ગત જૂન મહિનો આખો રાજ્યના તમામ તાલુકા અને ગામડાઓમાં કૃષિ શિબિરો અને સેમિનારોનું આયોજન કરવામાં આવશે, જેનો લાભ લેવા કૃષિ વિભાગ દ્વારા તમામ જગતના તાતને અનુરોધ કરવામાં આવ્યો છે.
