રાષ્ટ્રીય પરીક્ષણ એજન્સી (NTA) દ્વારા 3 મેના રોજ લેવાયેલી NEET-UG 2026 પરીક્ષા રદ કરવાની જાહેરાત કરવામાં આવી છે. હવે પરીક્ષા ફરીથી લેવામાં આવશે અને તેની નવી તારીખો ટૂંક સમયમાં જાહેર કરાશે. NTAએ સ્પષ્ટ કર્યું કે કેન્દ્ર સરકારની મંજૂરી બાદ આ નિર્ણય લેવામાં આવ્યો છે.
એજન્સી અનુસાર તપાસ દરમિયાન મળેલા પુરાવા અને કાયદા અમલીકરણ એજન્સીઓના અહેવાલોને આધારે હાલની પરીક્ષા પ્રક્રિયાની વિશ્વસનીયતા પર પ્રશ્નો ઉભા થયા હતા. તેથી વિદ્યાર્થીઓના હિતને ધ્યાનમાં રાખીને NEET-UG 2026 ફરી યોજવાનો નિર્ણય લેવામાં આવ્યો છે. નવી પરીક્ષાની તારીખો તેમજ એડમિટ કાર્ડ સંબંધિત માહિતી સત્તાવાર વેબસાઇટ પર જાહેર કરવામાં આવશે. NTAએ વધુમાં જણાવ્યું કે ઉમેદવારોને ફરીથી અરજી કરવાની જરૂર નહીં પડે અને અગાઉ ફાળવાયેલા પરીક્ષા કેન્દ્રોમાં પણ કોઈ ફેરફાર નહીં કરવામાં આવે. રી-એક્ઝામ માટે નવા એડમિટ કાર્ડ બહાર પાડવામાં આવશે. સાથે જ પરીક્ષા ફી પરત આપવા અંગે પણ નિર્ણય લેવામાં આવ્યો છે.
આ વર્ષે 3 મેના રોજ દેશભરમાં લગભગ 23 લાખ વિદ્યાર્થીઓએ NEET-UG 2026 પરીક્ષા આપી હતી. જોકે પરીક્ષા પહેલા જ પ્રશ્નપત્ર લીક થયાની આશંકાએ મામલો ગંભીર બન્યો હતો. રાજસ્થાનમાં કેટલાક વિદ્યાર્થીઓ પાસેથી મળેલા હાથથી લખાયેલા ગેસ પેપરના પ્રશ્નો મૂળ પરીક્ષાના પ્રશ્નો સાથે મેળ ખાતા હોવાનું સામે આવ્યું છે. 10 મેના રોજ રાજસ્થાન SOGએ ગુપ્ત માહિતીના આધારે કાર્યવાહી કરી દેહરાદૂન, સીકર અને ઝુંઝુનૂમાંથી 13 શંકાસ્પદ લોકોને કસ્ટડીમાં લીધા હતા. તેમાં સીકરની એક કોચિંગ સંસ્થાથી જોડાયેલા કરિયર કાઉન્સિલરનો પણ સમાવેશ થાય છે.
તપાસ દરમિયાન જાણવા મળ્યું કે પરીક્ષાના કુલ 720માંથી આશરે 600 માર્ક્સના પ્રશ્નો પરીક્ષા પહેલાં જ કેટલાક વિદ્યાર્થીઓ સુધી પહોંચી ગયા હતા. કહેવાય છે કે કેરળની એક મેડિકલ કોલેજમાં અભ્યાસ કરતા વિદ્યાર્થીએ 1 મેના રોજ આ ગેસ પેપર પોતાના મિત્રને મોકલ્યું હતું, જે બાદ તે સીકરમાં અનેક વિદ્યાર્થીઓ સુધી ફેલાયું હતું.
