જૂનાગઢ શહેરમાં પિતા-પુત્રીના સંબંધને લજવતો કિસ્સો સામે આવ્યો છે. દીકરી 10 વર્ષની હતી ત્યારથી જ પિતા દુષ્કર્મ આચરતો રહ્યો. પીડિતા 15 વર્ષની થઈ અને હિંમત કરી મદદ માટે પાડોશીનો સંપર્ક કરી પિતાની કરતૂત વિશે જણાવતા પાડોશીએ મદદ કરવાને બદલે પીડિતાની નિર્દોષતાનો લાભ લઈ દુષ્કર્મ આચર્યું. આ બનાવે સમગ્ર વિસ્તારમાં ચકચાર મચાવી દીધી છે.
ઉલ્લેખનીય છે કે, આ મામલો 181 મહિલા હેલ્પલાઈન સુધી પહોંચતા તાત્કાલિક કાર્યવાહી હાથ ધરાઈ હતી. પોલીસે પીડિતાનું કાઉન્સેલિંગ કરી નિવેદન નોંધ્યું હતું. પિતા તથા પાડોશી બંને સામે પોક્સો એક્ટ તથા BNSની કલમ 64 અને 65 હેઠળ ગુનો દાખલ કરવામાં આવ્યો છે. પોલીસ તપાસ મુજબ પીડિતાની માતા માનસિક રીતે અસ્વસ્થ હોવાથી પિતાએ એકલતાનો લાભ લઈને 10 વર્ષીય દીકરી પર પહેલીવાર દુષ્કર્મ આચર્યું અને સતત પાંચ વર્ષ સુધી આ કૃત્ય ચાલુ રાખ્યું હતું. પીડિતાએ 15 વર્ષની ઉંમરે હિંમત પૂર્વક પાડોશીને વાત જણાવી ત્યારે મદદ કરવાની જગ્યાએ પાડોશીએ પણ પીડિતા પર દુષ્કર્મ આચર્યું હતું.
DySP હિતેશ ધાંધલીયાએ જણાવ્યું હતું કે, પીડિતાની ફરિયાદને આધારે બંને આરોપીઓને ઝડપી પાડવામાં આવ્યા છે. મામલો ગંભીર હોવાથી CWC અધિકારીઓ, મહિલા પોલીસ, સામાજિક કાર્યકર્તા અને સરકારી પંચોની હાજરીમાં આગળની તપાસ હાથ ધરાઈ રહી છે.
