હળવદ તાલુકા પોલીસ મથકમાં કુલ 10.43 લાખ રૂપિયાના દારૂના જથ્થાનો નાશ કર્યો છે. હળવદ તાલુકાના સુખપર ગામની સીમમાં આવેલા ડેમ તરફના રસ્તે ખરાબાની જમીન પર આ કાર્યવાહી હાથ ધરવામાં આવી હતી. પોલીસ, રેવન્યુ અને નશાબંધી વિભાગના અધિકારીઓની હાજરીમાં દારૂનો નાશ કરાયો હતો.

વર્ષ 2024માં હળવદ તાલુકામાં દારૂ સંબંધિત કુલ 105 ગુના નોંધાયા હતા. આ કેસોમાં 4,785 બોટલ ઇંગ્લિશ દારૂ અને બીયર જપ્ત કરાયો હતો, જેની કિંમત 8.94 લાખ રૂપિયા હતી. આ ઉપરાંત દેશી દારૂના 80 કેસોમાં 747 લીટર દેશી દારૂ પણ જપ્ત કરાયો હતો, જેની કિંમત 1.49 લાખ રૂપિયા હતી. આમ, કુલ 10.43 લાખ રૂપિયાના મુદ્દામાલનો નાશ કરવામાં આવ્યો છે.