હરિયાણા બીજેપી નેતા સોનાલી ફોગાટના મૃત્યુના સંબંધમાં ગોવા પોલીસે શુક્રવારે ક્લબના માલિક અને ડ્રગ સ્મગલર સહિત વધુ બે લોકોની ધરપકડ કરી હતી. પોલીસે ક્લબના વોશરૂમમાંથી ડ્રગ્સ પણ મળી આવ્યું હતું. ગોવા પોલીસે જણાવ્યું હતું કે, “કલબમાંથી ડ્રગ્સ મળી આવતા માલિકની ધરપકડ કરવામાં આવી હતી. પૂછપરછ બાદ તેની ધરપકડ કરવામાં આવી છે. જપ્ત કરાયેલા ડ્રગ્સ વિશે વધુ વિગતો આવવાની બાકી છે.”
પોલીસે ડ્રગ્સ સ્મગલર દત્તપ્રસાદ ગાંવકરની ધરપકડ કરી છે. તેણે આરોપી સુખવિંદર સિંહને ડ્રગ્સ સપ્લાય કર્યું હતું. પોલીસે ગઈ કાલે આ કેસમાં બે આરોપી સુખવિંદર સિંહ અને સુધીર સાંગવાનની ધરપકડ કરી હતી.
આ પહેલા ગોવા પોલીસે કહ્યું હતું કે સોનાલી ફોગાટના ડ્રિંકમાં તેના બે સહયોગીઓ દ્વારા પાર્ટી દરમિયાન નશીલા પદાર્થ ભેળવવામાં આવ્યા હતા. આ કદાચ ફોગાટના મૃત્યુ તરફ દોરી ગયું. આ બંને ફોગાટ મર્ડર કેસમાં આરોપી છે. ગોવા પોલીસે શુક્રવારે આ જાણકારી આપી હતી. એક વરિષ્ઠ પોલીસ અધિકારીએ જણાવ્યું હતું કે ફોગાટની હત્યા પાછળનું કારણ આર્થિક હિત હોઈ શકે છે. તેમણે કહ્યું કે બંને આરોપીઓ (સુધીર સાંગવાન અને સુખવિંદર સિંહ)ની ધરપકડ કરવામાં આવી છે જેથી તેઓ પુરાવા સાથે છેડછાડ ન કરી શકે અને સાક્ષીઓને પ્રભાવિત કરી શકે નહીં.
પોલીસ મહાનિરીક્ષક ઓમવીર સિંહ બિશ્નોઈએ જણાવ્યું હતું કે બંને આરોપીઓ પીણામાં “કેટલાક રાસાયણિક પદાર્થ” ઉમેરતા જોવા મળ્યા હતા, જે અંજુના રેસ્ટોરન્ટમાં યોજાયેલી પાર્ટીમાં ફોગટને પીરસવામાં આવી હતી. સાંગવાન અને સિંહ ફોગટ સાથે 22 ઓગસ્ટે ગોવા ગયા હતા. બિશ્નોઈએ કહ્યું કે આરોપીઓએ પોલીસ પૂછપરછ દરમિયાન ઉત્તર ગોવામાં અંજુના રેસ્ટોરન્ટમાં ફોગટને જાણી જોઈને ડ્રગ્સ આપ્યાનું કબૂલ્યું છે. આ ઘટના 22-23 ઓગસ્ટની વચ્ચેની રાત્રે બની હતી.
