વડાપ્રધાન નરેન્દ્ર મોદી હાલમાં યુરોપના પ્રવાસે છે. જ્યાં તેઓ ફ્રાંસના રાષ્ટ્રપતિ ઇમેન્યુઅલ મેક્રોનને પણ મળશે. જેમણે તાજેતરમાં ફરીથી ચૂંટણી જીત્યા બાદ રાષ્ટ્રપતિ પદ જાળવી રાખ્યું હતું. દરમિયાન, વડાપ્રધાન નરેન્દ્ર મોદીની ફ્રાન્સની નિર્ધારિત મુલાકાત પહેલાં, ફ્રેન્ચ સંરક્ષણ અગ્રણી નેવલ ગ્રૂપે જાહેરાત કરી છે કે તે P-75 ઇન્ડિયા (P-75I) પ્રોજેક્ટમાં ભાગ લેવા માટે તૈયાર નથી.
આ પ્રોજેક્ટ હેઠળ ભારતીય નૌકાદળ માટે ભારતમાં છ પરંપરાગત સબમરીન બનાવવામાં આવનાર છે. ફ્રેન્ચ સમૂહ રૂ. 43,000 કરોડના પ્રોજેક્ટ માટે પસંદ કરાયેલી પાંચ આંતરરાષ્ટ્રીય કંપનીઓમાંથી એક છે. તેમણે જણાવ્યું હતું કે તે વિનંતી માટેની દરખાસ્ત (RFP)ની શરતોને પૂર્ણ કરી શકતી નથી. અને તેથી, તેની બિડિંગ ચાલુ રાખશે નહીં. ધ ઈન્ડિયન એક્સપ્રેસના અહેવાલ મુજબ, આ પ્રોજેક્ટ નવા વ્યૂહાત્મક ભાગીદારી મોડલ હેઠળનો સૌથી મોટો પ્રોજેક્ટ છે. આ પ્રોજેક્ટ હેઠળ, એક ભારતીય કંપની સંયુક્ત રીતે ભારતમાં સબમરીનનું નિર્માણ કરશે. આંતરરાષ્ટ્રીય કંપનીઓની ભાગીદારી સાથે ટેક્નોલોજી શેર કરશે.
P-75I ભારતમાં સબમરીન બનાવવાનો બીજો પ્રોજેક્ટ છે. નેવલ ગ્રૂપે ભારતમાં મઝાગોન ડોકયાર્ડ શિપબિલ્ડિંગ લિમિટેડ (MDL) સાથે ભાગીદારીમાં P-75 પ્રોજેક્ટ હેઠળ છ કલવરી ક્લાસ (સ્કોર્પિન ક્લાસ) પરંપરાગત સબમરીનનું નિર્માણ પૂર્ણ કર્યું છે. P-75 પ્રોજેક્ટ પર 2005માં હસ્તાક્ષર કરવામાં આવ્યા હતા. (નૌકાદળ જૂથને તે સમયે DCNS કહેવામાં આવતું હતું) અને છ માંથી ચાર સબમરીન પહેલેથી જ નેવીમાં સામેલ કરવામાં આવી છે. છઠ્ઠી સબમરીનનું બાંધકામ ગયા મહિને શરૂ થયું હતું અને તે આવતા વર્ષના અંત સુધીમાં કાર્યરત થવાની હતી.
