મોરબી જિલ્લાના એક માત્ર નવલખી પોર્ટથી દૈનિક મોટા પાયે કોલસા અને તેમજ વવાણીયા થી મીઠાનું લોડ થાય છે એક તરફ રાજ્ય સરકાર દ્વારા નવલખી પોર્ટને ડેવલપ કરવામાં આવી રહ્યું છે. અહી જેટીની કામગીરી પુર જોશમાં ચાલી રહી છે જેના કારણે ભવિષ્યમાં વધુ શીપીંગની કામગીરી થવાની શક્યતા છે અને આ શક્યતા ને ધ્યાને લઇ રેલ્વે તંત્ર પણ સક્રિય બન્યું છે અને રાજકોટ રેલ્વે ડીવીઝન અંતર્ગત આવતા નવલખી પોર્ટમાં રેલ્પાવેની આધુનિક સુવિધા ઉપલબ્સેધ કરવા કમર કશી છે. રાજકોટ રેલ્વેના ડી આર એમ અશ્વિની કુમાર ની દેખરેખ નીચે નવલખી પોર્ટમાં આવેલા 8 ગુડ સેડ તેમજ આસપાસની મિલકતનો વિકાસ કરવા જઈ રહ્યું છે. રેલ્વે તંત્ર દ્વારા તેના માટે અંદાજીત 6.6 કરોડ રૂપિયાનો ખર્ચ કરશે.
નવલખી ગુડ્સ શેડને આધુનિક અને સંપૂર્ણ સજ્જ ગોડાઉન તરીકે વિકસાવવામાં આવશે. ભૌગોલિક રીતે, નવલખી ગુડ્સ શેડ એક છેવાડાના વિસ્તારમાં આવેલું છે. જ્યાં નજીકમાં કોઈ રહેણાંક વિસ્તાર નથી. અહીં કોલસો સતત ઉડતો રહે છે જેના કારણે ત્યાં કામ કરવું એક મોટો પડકાર બની જાય છે. રાજકોટ ડિવિઝન આવા પડકારજનક સંજોગોમાં કામ કરતા રેલ્વે કર્મચારીઓ અને મજૂરોને વધુ સારી સુવિધાઓ પૂરી પાડવા માટે તમામ પ્રયાસો કરી રહ્યું છે. રેલ્વે ટ્રેક પર જામેલા કોલસાને સાફ કરવામાં આવી રહ્યો છે . સ્ટેશન માસ્ટર અને ચીફ ગુડ્સ સુપરવાઇઝરના રૂમમાં જરૂરી સુવિધા અને એસી આપવામાં આવ્યું છે. આધુનિક શૌચાલયની સુવિધા ઉપલબ્ધ કરાવવામાં આવી છે. સ્વચ્છ પીવાના પાણીની ઉપલબ્ધતા પણ સુનિશ્ચિત કરવામાં આવી છે. રાત્રે પૂરતી લાઇટિંગ પૂરી પાડવા માટે ગુડ્સ શેડ પરિસરમાં એક વધારાનો હાઇ માસ્ટ ટાવર સ્થાપિત કરવામાં આવ્યો છે.
હાલમાં નવલખી ગુડ્સ શેડમાં ઘણા નવા બાંધકામો ચાલી રહ્યા છે. આ ગુડ્સ શેડમાં એક નવું ઓફિસ કોમ્પ્લેક્સ બનાવવામાં આવશે. જેમાં નવી રેલ્વે ગુડ્સ શેડ ઓફિસ, સ્ટેશન માસ્ટર ઓફિસ, ટ્રેડર્સ રૂમ, લેબર રેસ્ટ રૂમ વગેરે બનાવવામાં આવશે. ઉપરાંત, રેલ્વે કર્મચારીઓ, વેપારીઓ અને મજૂરોને સારી ગુણવત્તાનો નાસ્તો અને ભોજન સરળતાથી મળી રહે તે માટે કેન્ટીનનું બાંધકામ પણ ચાલી રહ્યું છે. લાઇન નંબર 1 પર નવું પ્લેટફોર્મ બનાવવામાં આવી રહ્યું છે. આ સાથે, લાઇન નંબર 2 ના પ્લેટફોર્મને લંબાવવામાં આવી રહ્યું છે. વાહનોની સરળ અવરજવર માટે એક નવો એપ્રોચ રોડ બનાવવામાં આવી રહ્યો છે. લોડિંગ દરમિયાન રેલ્વે ટ્રેકને નુકસાન ન થાય તે માટે વે-બ્રિજ પાસે કોંક્રિટની દિવાલ બનાવવામાં આવી રહી છે. લાઇન નંબર 1 અને 2 ને સિમેન્ટનો ઉપયોગ કરીને બેલાસ્ટ ફ્રી ટ્રેક બનાવવામાં આવી રહ્યો છે. સ્વચ્છતા સુનિશ્ચિત કરવા માટે, સંપૂર્ણપણે ઢંકાયેલી ડ્રેનેજ સિસ્ટમની જોગવાઈ કરવામાં આવી રહી છે.
નવલખી ગુડ સેડ થકી રેલ્વેને 51.20 કરોડની આવક થઇ
નાણાકીય વર્ષ 2024-25માં નવલખી ગુડ્સ શેડમાંથી કુલ 113 માલગાડી ના રેક ચલાવવામાં આવ્યા હતા, જેમાં લગભગ 4.56 લાખ ટન કોલસાના લોડિંગથી રેલવેને 51.20 કરોડ રૂપિયાની આવક થઈ હતી. નવલખી ગુડ્સ શેડ ના પુનઃવિકાસનો કુલ ખર્ચ આશરે રૂ. 6.6 કરોડ છે. આ પુનર્વિકાસ કાર્યને કારણે, અહીં લોડિંગ ક્ષમતા વધશે, નવા પ્લેટફોર્મના નિર્માણને કારણે લોડિંગનો સમય ઓછો થશે અને રેલ્વે કર્મચારીઓ, મજૂરો અને વેપારીઓને વધુ સારી સુવિધાઓ ઉપલબ્ધ થશે.
