નેશનલ ઇન્વેસ્ટિગેશન એજન્સી (NIA) હાલમાં દેશના 6 રાજ્યોના 13 જિલ્લામાં મોટા દરોડા પાડી રહી છે. આ દરોડો આતંકવાદી સંગઠન ISISના મોડ્યુલને લઈને કરવામાં આવી રહ્યો છે. પ્રાપ્ત માહિતી અનુસાર, હાલમાં NIA મધ્યપ્રદેશ, ઉત્તર પ્રદેશ, મહારાષ્ટ્ર, ગુજરાત, બિહાર અને કર્ણાટકના 13 જિલ્લાઓમાં દરોડા પાડી રહી છે. આ દરોડામાં NIAને મોટી સફળતા મળી છે, જેમાં તપાસ એજન્સીના અધિકારીઓએ ઘણા ઈલેક્ટ્રોનિક ઉપકરણો અને ગુનાહિત દસ્તાવેજો જપ્ત કર્યા છે.
ધ્યાને લેવાયો આ કેસ: NIAએ 25 જૂન 2022ના રોજ IPCની કલમ 153A, 153B અને UA (P) એક્ટની કલમ 18, 18B, 38, 39 અને 40 હેઠળ દેશના વિવિધ રાજ્યોમાં આતંકવાદી પ્રવૃત્તિઓ માટે કેસ નોંધ્યો હતો, ત્યારબાદ NIA મધ્યપ્રદેશના ભોપાલ અને રાયસેન, ગુજરાતના ભરૂચ, સુરત, નવસારી અને અમદાવાદ, બિહારના અરરિયા, કર્ણાટકના ભટકલ અને તુમકુર, મહારાષ્ટ્રના કોલ્હાપુર અને નાંદેડ અને ઉત્તર પ્રદેશના દેવબંધ જિલ્લામાં દરોડા પાડવામાં આવ્યા છે.
ધરપકડ કરાઈ: 6 રાજ્યોના 13 જિલ્લામાં દરોડા દરમિયાન NIA અને ઉત્તર પ્રદેશ ATSએ મળીને ઉત્તર પ્રદેશના દેવબંદમાંથી એક શંકાસ્પદ યુવકની ધરપકડ કરી છે. મીડિયા રિપોર્ટ્સ અનુસાર, શંકાસ્પદ વ્યક્તિનું નામ ફારૂક છે, જે ઘણી ભાષાઓ બોલે છે. તે દેવબંદની એ જ મદરેસામાં ભણતો હતો, જે લાંબા સમયથી NIAના રડાર પર હતી. જોકે NIA તરફથી હજુ સુધી આ અંગે કોઈ સત્તાવાર નિવેદન આવ્યું નથી.
