મોરબી જિલ્લામાં દારૂ અને જુગાર જેવી અસામાજિક પ્રવૃત્તિઓને જડમૂળથી નાબૂદ કરવા માટે નાયબ પોલીસ મહાનિરીક્ષક (રાજકોટ વિભાગ) તથા મોરબી જિલ્લા પોલીસ અધીક્ષક દ્વારા આપવામાં આવેલી કડક સૂચના અન્વયે મોરબી લોકલ ક્રાઈમ બ્રાન્ચ (LCB) અને પેરોલ ફર્લો સ્ક્વોડને એક મોટી સફળતા મળી છે. પોલીસે મોરબી-માળિયા નેશનલ હાઈવે પર રવિરાજ ચોકડી નજીકથી એક માલવાહક રિક્ષામાંથી લાખો રૂપિયાની કિંમતનો વિદેશી દારૂ અને વોડકાનો જથ્થો ઝડપી પાડ્યો છે.

મળતી વિગત મુજબ, એલ.સી.બી. અને પેરોલ ફર્લો સ્ક્વોડના અધિકારીઓ તથા કર્મચારીઓ પેટ્રોલીંગમાં હતા, તે દરમિયાન ખાનગી રાહે ચોક્કસ બાતમી મળી હતી કે, માળિયા તરફથી મોરબી તરફ આવી રહેલી એક લીલા કલરની બજાજ મેક્સિમા માલવાહક રિક્ષા (રજી. નં. GJ 03 BX 3237) માં ગેરકાયદેસર રીતે ભારતીય બનાવટના પરપ્રાંતીય વિદેશી દારૂનો જથ્થો છુપાવીને લાવવામાં આવી રહ્યો છે.

આ બાતમીના આધારે પોલીસે તાત્કાલિક એક્શનમાં આવી મોરબી-માળિયા હાઈવે પર રવિરાજ ચોકડી પાસે આવેલા ક્રિસ્ટલ કોલ નજીક સર્વિસ રોડ પર વોચ ગોઠવી હતી. દરમિયાન બાતમીવાળી રિક્ષા ત્યાંથી પસાર થતાં જ પોલીસે તેને આંતરીને તલાશી લીધી હતી. રિક્ષાની તપાસ કરતા તેમાંથી મોટી માત્રામાં વિદેશી વ્હીસ્કી અને વોડકાની બોટલો મળી આવી હતી.

કુલ રૂ. ૫.૮૮ લાખથી વધુનો મુદ્દામાલ જપ્ત

પોલીસે ઘટનાસ્થળેથી નીચે મુજબનો મુદ્દામાલ કબજે કર્યો છે:

એક આરોપીની અટકાયત, બે બુટલેગરોને પકડવા ચક્રો ગતિમાન

પોલીસે રિક્ષા ચાલક સમીરશા ઉર્ફે ટોની ચાકુબશા શાહમદાર (રહે. મકરાણી વાસ, જેલની પાછળ, મોરબી) ની ધરપકડ કરી લીધી છે. જ્યારે આ ગુનામાં સંડોવાયેલા અન્ય બે આરોપીઓ:

૧. અવેશભાઈ પીલુડીયા (રહે. વીસીપરા, મોરબી) અને

૨. સલીમભાઈ જુસબભાઈ કટીયા (રહે. મચ્છીપીઠ, મોરબી) હાજર મળી આવ્યા ન હોવાથી પોલીસે તેમને પકડવા ચક્રો ગતિમાન કર્યા છે. આ મામલે મોરબી તાલુકા પોલીસ સ્ટેશનમાં પ્રોહિબિશન ધારા હેઠળ ગુનો નોંધી આગળની કાયદેસરની કાર્યવાહી હાથ ધરવામાં આવી છે.

કામગીરી કરનાર ટીમ:

આ સફળ કામગીરી એલ.સી.બી. મોરબીના ઇન્ચાર્જ પોલીસ ઇન્સ્પેક્ટર આર.સી.ગોહિલ, પેરોલ ફર્લો સ્ક્વોડના પીએસઆઈ વી.જી.માલાણી તથા એલ.સી.બી./પેરોલ ફર્લો સ્ક્વોડના સ્ટાફના માણસો દ્વારા સંયુક્ત રીતે કરવામાં આવી હતી.