મેઘરાજાની ધમાકેદાર બેટિંગથી ગુજરાતના પ્રસિદ્ધ યાત્રાધામ અંબાજીમાં ઠેર ઠેર પાણી ભરાયા છે ભારે વરસાદને પગલે અમદાવાદ આબુ હાઈવે ઉપર પાણી ફરી વળ્યા હતા.જેને લીધે વાહન ચાલકોને મુશ્કેલી સર્જાઈ હતી. આ ઉપરાંત હાઈવે ઉપર લાંબો ટ્રાફિક જામ સર્જાયો હતો. અંબાજીમાં પોલીસ સ્ટેશન નજીકનો માર્ગ પાણીમાં ગરકાવ થયો હતો અને ઘૂંટણસમા પાણી ભરાયા હતા. આ ઉપરાંત ધર્મશાળાના ગેટમાં પાણી ઘુસ્યા હતા. સમગ્ર શહેરમાં વાહનવ્યવહાર ઠપ થઇ ગયો હતો.
હવામાન વિભાગ દ્વારા આગામી 5 દિવસ રાજ્યમાં વરસાદી માહોલ રહેવાની આગાહી કરવામાં આવી છે. આ સાથે જ હવામાન વિભાગે આગામી 3 દિવસ રાજ્યમાં ભારે વરસાદ રહેવાની સંભાવના વ્યક્ત કરી છે.હાલ રાજ્યમાં 2 વરસાદી સિસ્ટમો સક્રિય છે.
વૉકમાર્ક લો પ્રેશર અને વરસાદી ટર્ફની અસરથી ભારેથી અતિભારે વરસાદ વરસી શકે છે. આ ઉપરાંત નવરાત્રીમાં પણ છૂટો-છવાયો વરસાદ પડવાની સંભાવના રહેલી છે. તારીખ 17 અને 18 સપ્ટેમ્બરના રોજ સૌરાષ્ટ્ર અને કચ્છમાં ભારે વરસાદની શકયતા વ્યક્ત કરવામાં આવી છે. રાજ્યમાં ચોમાસાની પુર્ણાહુતી 5 ઓક્ટોબર સુધીમાં થઇ શકે છે તેમ હવામાન વિભાગ દ્વારા જણાવવામાં આવ્યું છે.
