તમિલનાડુ,બુધવાર
ચીફ ઓફ ડિફેન્સ સ્ટાફ જનરલ બિપિન રાવત સાથેનું આર્મી હેલિકોપ્ટર આજે તમિલનાડુના કુન્નુરમાં ક્રેશ થયું હતું. સત્તાવાર સૂત્રોએ જણાવ્યું હતું કે વરિષ્ઠ સંરક્ષણ અધિકારીઓને લઈ જતું એક હેલિકોપ્ટર નીલગીરી જિલ્લામાં ક્રેશ થયું હતું. આ અકસ્માત કોઈમ્બતુર અને સુલુર વચ્ચે થયો હતો. તેમણે જણાવ્યું કે રાવત, તેમનો સ્ટાફ અને પરિવારના કેટલાક સભ્યો Mi સિરીઝના હેલિકોપ્ટરમાં હતા. ઈમરજન્સી ટીમો સ્થળ પર છે અને બચાવ કાર્ય ચાલુ છે. મીડિયાએ અહેવાલ આપ્યો છે કે બે લોકો ગંભીર રીતે ઘાયલ થયા છે અને તેમને હોસ્પિટલમાં લઈ જવામાં આવ્યા છે. અત્યાર સુધીમાં ત્રણ જવાનોને બચાવી લેવાયા છે.
ખરાબ હવામાનને કારણે અકસ્માત
જણાવવામાં આવી રહ્યું છે કે ખરાબ હવામાન અને ધુમ્મસના કારણે આ દુર્ઘટના બની હતી. મળતી માહિતી મુજબ સીડીએસ રાવત પોતાની પત્ની સાથે ઉટીમાં એક કાર્યક્રમમાં હાજરી આપવા જઈ રહ્યા હતા. પરંતુ આ દુર્ઘટના કુન્નુરના ગાઢ જંગલમાં બની છે. હેલિકોપ્ટર ક્રેશ થયા બાદ ભારે આગ ફાટી નીકળી હતી, બચાવ કામગીરી હજુ ચાલુ છે. હજુ સુધી સેના તરફથી કોઈ માહિતી આવી નથી.
