ગાંધીનગર,બુધવાર
મુખ્યમંત્રી ભૂપેન્દ્ર પટેલ આગામી જાન્યુઆરી 2022માં યોજાનારા વાયબ્રન્ટ ગુજરાત ગ્લોબલ સમિટ પહેલા દુબઈ રોડ શો માટે આજથી દુબઈના બે દિવસના પ્રવાસે ગુજરાત પ્રતિનિધિ મંડળ સાથે રવાના થયા છે.ભૂપેન્દ્ર પટેલને અમદાવાદ ઈન્ટરનેશનલ એરપોર્ટ પરથી દુબઈ જવા પહેલા રાજ્ય મંત્રી મંડળના મંત્રી અર્જુન સિંહ,રાજ્ય મંત્રી હર્ષ સંઘવી ,મુકેશ પટેલ તેમજ મુખ્ય સચિવ પંકજ કુમાર અને વરિષ્ઠ સચિવોએ ભાવભરી વિદાય આપી પ્રવાસની સફળતાની શુભેચ્છાઓ પાઠવી હતી
આજે ગુજરાતના મુખ્યમંત્રી તરીકે ભૂપેન્દ્ર પટેલનો પહેલો વિદેશ પ્રવાસ શરુ થઈ રહ્યો છે.મુંબઈ ગયા બાદ આજે સીએમ ભૂપેન્દ્ર પટેલ દુબઈના પ્રવેશ માટે જઈ રહ્યા છે. આગામી મહિને ગાંધીનગરમાં યોજાનારા વાઈબ્રન્ટ ગુજરાત સમિટને ધ્યાનમાં રાખીને આ પ્રવાસ ઘણો જ મહત્વનો માનવામાં આવી રહ્યો છે. તેઓ અહીં જઈને વિદેશના ઉદ્યોગપતિઓને ગુજરાતમાં રોકાણ કરવા માટે આમંત્રણ આપશે. આ સાથે તેઓ ગુજરાત રોકાણ માટે કઈ રીતે શ્રેષ્ઠ છે તે અંગે પણ ઉદ્યોગપતિઓને માહિતગાર કરશે.
વિગતો એવી સામે આવી રહી છે કે, આજે દુબઈ જઈ રહેલા ભૂપેન્દ્ર પટેલ 9 ડિસેમ્બરના રોજ અબુધાબીમાં રોડ-શો પણ કરવાના છે.મુખ્યમંત્રી સાથે જઈ રહેલું પ્રતિનિધિમંડળ દુબઈમાં ઉદ્યોગસાહસિકો સાથે વન-ટુ-વન બેઠક કરશે અને તેમને ગુજરાત આવવા માટે આકર્ષિત કરશે. હાલ દુબઈમાં ચાલી રહેલા એક્સપોમાં આવેલા ઈન્ડિયા પેવેલિયનની પણ મુખ્યમંત્રી મુલાકાત લેશે.
ભૂપેન્દ્ર પટેલ અને તેમની ટીમ દુબઈમાં ઉદ્યોગકારો સમક્ષ રોકાણની તકો અંગે પ્રેઝન્ટેશન કરશે અને વન-ટુ-વન બેઠક કરીને મૂડીરોકાણ કરવા ઈચ્છતા ઉદ્યોગકારોને ગુજરાત શા માટે શ્રેષ્ઠ છે તે અંગે માહિતગાર કરશે. મુખ્યમંત્રી સાથે ગયેલું પ્રતિનિધિ મંડળ દુબઈમાં ઉર્જા, એન્જિનિયરિંગ, હોસ્પિટાલિટી, આરોગ્ય, લોજિસ્ટિક્સ, ફિટનેસ તથા અન્ય સેવાઓના ક્ષેત્રમાં રોકાણ કરવા અંગે માહિતીગાર કરશે. ગુજરાત રોકાણ માટે કઈ રીતે શ્રેષ્ઠ છે તે અંગે તેઓ દુનિયાના જાણીતા ઉદ્યોગ સાહસિકો સાથે પણ વાત કરી શકે છે. મુખ્યમંત્રી ભૂપેન્દ્ર પટેલની સાથે ઉદ્યોગ રાજ્યમંત્રી જગદીશ વિશ્વકર્મા અને ઉચ્ચ સ્તરનું પ્રતિનિધિ મંડળ પણ હાજર રહેશે. મુખ્યમંત્રીની ટીમમાં ચીફ પ્રિન્સિપલ સેક્રેટરી કે. કૈલાશનાથ, ઉદ્યોગ વિભાગના એડિશનલ ચીફ સેક્રેટરી ડૉ. રાજીવકુમાર ગુપ્તા, બિઝનેસ અગ્રણીઓ તથા રાજ્ય સરકારના વરિષ્ઠ અધિકારીઓ જોડાશે. મુખ્યમંત્રી રોકાણ કરવા માટે ઈચ્છુક કંપનીઓને વાઈબ્રન્ટ ગુજરાતમાં હાજર રહેવા માટે પણ આમંત્રણ આપશે, જેથી ઉદ્યોગસાહસિકો ગુજરાતની ભૂમિથી વાકેફ થાય. આ વર્ષે વાઈબ્રન્ટ ગુજરાતની થીમ ‘આત્મનિર્ભર ગુજરાતથી આત્મનિર્ભર ભારત’ રાખવામાં આવી છે, જેથી સીએમ ભૂપેન્દ્ર પટેલ અને તેમની ટીમ વડાપ્રધાન નરેન્દ્ર મોદીના ડ્રીમ પ્રોજેક્ટ અને તેમના વિકાસ પથની પણ ચર્ચાઓ કરી શકે છે. ગુજરાતમાં 10 અને 11 જાન્યુઆરી 2022 દરમિયાન વાઈબ્રન્ટ ગુજરાત સમિટનું આયોજન કરવામાં આવ્યું છે.
