મોરબી તાલુકા પોલીસ સ્ટેશનની હદમાં આવેલા ટીંબડી રોડ પર એક કારખાનામાં કામ દરમિયાન ક્રેઈનનો બેલ્ટ તૂટી પડતાં ગંભીર અકસ્માત સર્જાયો હતો. આ દુર્ઘટનામાં લોખંડના ભારે પ્લેટફોર્મ નીચે દબાઈ જવાથી ઉત્તર પ્રદેશના એક 40 વર્ષીય શ્રમિકનું કરુણ મોત નીપજ્યું છે. ઘટનાને પગલે શ્રમિક પરિવારમાં અરેરાટી વ્યાપી ગઈ છે.
મળતી માહિતી મુજબ, મૂળ ઉત્તર પ્રદેશના ગાજાપુરના વતની અને હાલ મોરબીના ટીંબડી રોડ પર ગુરૂકુલ સ્કૂલની સામે આવેલા ‘એ એન્ડ જે. માઇક્રોન પ્રાઇવેટ લિમિટેડ’ કારખાનામાં રહીને મજૂરી કામ કરતા સંતોષભાઈ વિજયભાઈ માહવા (ઉંમર વર્ષ 40) રવિવારે રાત્રે કારખાનામાં ફરજ પર હતા. તે દરમિયાન ફેક્ટરીમાં ક્રેઈન (Crane) ની મદદથી સાયકલોન ઉપર લોખંડનું એક ભારે પ્લેટફોર્મ ચડાવવાની કામગીરી ચાલી રહી હતી. આ કામગીરી દરમિયાન અચાનક જ ક્રેઈનનો બેલ્ટ તૂટી ગયો હતો, જેથી ક્રેઈન પર લટકતું લોખંડનું આખું પ્લેટફોર્મ નીચે ઊભેલા સંતોષભાઈ પર ખાબક્યું હતું. લોખંડના વજનદાર પ્લેટફોર્મ નીચે સંતોષભાઈ ખરાબ રીતે દબાઈ જતાં આસપાસના અન્ય કામદારોએ ભારે જહેમત બાદ તેમને બહાર કાઢ્યા હતા. ગંભીર રીતે ઘવાયેલા શ્રમિકને તાત્કાલિક સારવાર અર્થે મોરબીની ક્રિષ્ણા હોસ્પિટલમાં ખસેડવામાં આવ્યા હતા. જો કે, ત્યાં ટૂંકી સારવાર દરમિયાન તેમણે દમ તોડી દીધો હતો. ઘટનાની જાણ થતાં જ ડૉ. દર્શન કાનાણીએ મોરબી તાલુકા પોલીસને આ અંગે માહિતી આપી હતી. ત્યારબાદ મૃતદેહને પોસ્ટમોર્ટમ (PM) અર્થે સરકારી હોસ્પિટલ ખાતે લાવવામાં આવ્યો હતો
આ બનાવ અંગે મોરબી તાલુકા પોલીસે અકસ્માત મોત તરીકે નોંધ કરી છે. પોલીસે નવા કાયદા બી.એન.એસ.એસ. (BNSS)ની કલમ-194 મુજબ કાયદેસરની કાર્યવાહી હાથ ધરી છે. કેસની વધુ તપાસ મોરબી તાલુકા પોલીસ સ્ટેશનના પીએસઆઈ કે.એચ. અંબારીયા ચલાવી રહ્યા છે. કારખાનામાં સેફ્ટીના સાધનો કે નિયમોની ચૂક હતી કે કેમ તે દિશામાં પણ પોલીસ તપાસ કરી શકે છે.
