મોરબીના સરદારનગર-2 વિસ્તારમાં રહેતા અને મૂળ સરવડ ગામના વતની નિલેશભાઈ દુર્લભજીભાઈ શેરસીયાએ માળીયા પોલીસ મથકમાં આરોપી ચિરાગભાઈ રમેશભાઈ ગામી સામે ફરિયાદ નોંધાવી છે. ફરિયાદ મુજબ આરોપી વારંવાર તેમના માતા-પિતા તેમજ કાકા-કાકી સાથે ગાળો બોલતો હતો. આ બાબતે ગાળો બોલવાની મનાઈ કરતાં આરોપીએ નિલેશભાઈ અને તેમના સાથીને પણ અપશબ્દો કહી જાનથી મારી નાખવાની ધમકી આપી હતી.
આ ઉપરાંત આરોપીએ શેરીમાં પાર્ક કરેલી નિલેશભાઈની ગ્રે કલરની સ્વિફ્ટ VDI કાર (નંબર RJ-03-FK-3197) પર લાકડાના ધોકા અને પથ્થર વડે હુમલો કરી નુકસાન પહોંચાડ્યું હોવાનું ફરિયાદમાં જણાવાયું છે. પોલીસે ફરિયાદના આધારે ગુનો નોંધી કાયદેસરની કાર્યવાહી હાથ ધરી છે.
