રાજ્યભરમાં છેલ્લા એક મહિનાથી પડી રહેલી કાળજાળ ગરમીને પગલે જન જીવનને ભારે અસર પડી છે જોકે આગામી બે ત્રણ દિવસ દરમિયાન તાપમાનમાં બે થી ત્રણ ડિગ્રીનો નોંધપાત્ર ઘટાડો થવાની શક્યતા છે. ભેજવાળા પવનો ફૂંકાતા હોવાથી લોકોને આકરી ગરમીનો સામનો કરવો નહીં પડે. તેવી આગાહી રાજ્ય હવામાન વિભાગ દ્વારા કરવામાં આવી છે.

છેલ્લા 24 કલાકમાં પણ તાપમાનમાં એકથી બે ડિગ્રીનો ઘટાડો નોંધાઈ ચૂક્યો છે. આગામી સાત દિવસ સુધી વાતાવરણ સૂકું અને સ્થિર રહેવાની સંભાવના છે. તેમ છતાં હાલમાં રાજ્યના સાતથી વધુ શહેરોમાં તાપમાન 40 ડિગ્રીથી ઉપર જોવા મળી રહ્યું છે. રાજ્યના મોટાભાગના શહેરોમાં તાપમાન સતત વધી રહ્યું હતું. અનેક જગ્યાએ પારો 42 થી 44 ડિગ્રી સુધી પહોંચી ગયો હતો. ખાસ કરીને અમદાવાદમાં તાપમાન 44 ડિગ્રીને પાર કરતાં લોકો ત્રાહિમામ પોકારી ઉઠ્યા હતા અને બપોરના સમયે રસ્તાઓ વેરાન જોવા મળતા હતા. હવે વાતાવરણની પેટર્નમાં સકારાત્મક ફેરફાર આવતાં રાજ્યવાસીઓને રાહતની અપેક્ષા છે.