વડોદરા જિલ્લાના નંદેસરી વિસ્તારમાં આવેલી દીપક નાઈટ્રેટ નામની કંપનીમાં ગુરુવારે બપોરે જોરદાર બ્લાસ્ટ થયો હતો. આ પછી અહીં ભીષણ આગ ફાટી નીકળી હતી. આ અકસ્માતમાં 15 કામદારો ઘાયલ થયા હતા. બચાવ કાર્ય માટે ફાયર બ્રિગેડની ટીમ પણ ઘટનાસ્થળે હાજર છે. આગ પર કાબુ મેળવવાના પ્રયાસો ચાલુ છે. અકસ્માતના પગલે વડોદરા હાઇવે બંધ કરી દેવામાં આવ્યો છે. સ્થાનિકોનું કહેવું છે કે બ્લાસ્ટ એટલો જોરદાર હતો કે તેનો અવાજ 10 કિમી દૂર સુધી સંભળાયો હતો.
બોઈલરમાં વિસ્ફોટ થયો હતો
ફાયર બ્રિગેડના કર્મચારીના જણાવ્યા અનુસાર, બ્લાસ્ટ બોઈલરમાં થયો હતો. આ પછી આગ આખા પ્લાન્ટમાં ફેલાઈ ગઈ અને તેના કારણે અન્ય બે બોઈલર પણ ફાટ્યા. લોકોએ જણાવ્યું કે એક પછી એક સતત 8 ધડાકા સંભળાયા. જેના કારણે સમગ્ર વિસ્તારમાં ચકચાર મચી ગઈ હતી.
ફાયર બ્રિગેડની 15 ગાડીઓ કામે લાગી
ફેક્ટરીમાં લાગેલી આગ એટલી ભયાનક છે કે આગ પર કાબૂ મેળવવા માટે ફાયર બ્રિગેડની 15 ગાડીઓ તૈનાત કરવામાં આવી છે. હાલ ફેક્ટરીના બહારના ભાગમાં લાગેલી આગ પર કાબુ મેળવી લેવામાં આવ્યો છે. પ્લાન્ટની અંદર ઘણી જગ્યાએ આગ હજુ પણ પ્રસરી રહી છે.
કંપનીની બહાર એમ્બ્યુલન્સ પણ તૈયાર રાખવામાં આવી હતી.
પરિસ્થિતિ બેકાબુ બનતા ફાયર બ્રિગેડની ટીમે બ્રિગેડ કોલ જારી કર્યો છે. આગ હજુ કાબુમાં આવી શકી નથી અને આગની જ્વાળાઓ ઉંચી વધી રહી છે. કંપનીની બહાર બે-ત્રણ એમ્બ્યુલન્સ પણ તૈયાર રાખવામાં આવી છે. આ ઉપરાંત સયાજી હોસ્પિટલમાં 15 તબીબો સહિત 25 લોકોની ટીમ પણ તૈયાર રાખવામાં આવી છે.
