મોરબીના ઐતિહાસિક ઝૂલતા પુલ તૂટી પડવાની દુર્ઘટનામાં 135 લોકોના મોત થવાની ઘટનામાં 14 મહિના જેટલો સમય વીતી ગયો હોય એક તરફ ઘટનામાં ઝડપાયેલા ઓરેવા ગ્રુપના એમ ડી જયસુખભાઈ પટેલ તેમના મેનેજર સહીતના 5 જેટલા લોકો જેલમાં છે તો બીજી તરફ હાઈકોર્ટ હજુ આ કેસમાં આકરી જોવા મળી રહી છે તાજેતરમાં કેસમાં સીટ દ્વારા તેમનો અંતિમ રીપોર્ટ કોર્ટમાં રજુ કરતા કોર્ટે ઓરેવા ગ્રુપને ખખડાવી નાખી હતી અને સીટ રીપોર્ટ બાદ તમે દલીલ કરવા લાયક નથી તેમ કહી કડક શબ્દોમાં ઝાટકણી કાઢી હતી આ કેસમાં હાઇકોર્ટે કહ્યું કે મોરબી ઝૂલતો પુલ દુર્ઘટનાના પીડિત પરિવારોને એકસાથે વળતરની મદદ નહીં મળે. કોર્ટે બ્રિજના સંચાલન અને જાળવણી માટે જવાબદાર કંપની ઓરેવા ગ્રૂપને એવા વૃદ્ધોને જીવન પેન્શન આપવાનો નિર્દેશ આપ્યો છે જેમના પુત્રોએ જીવ ગુમાવ્યો હતો. આ સિવાય વિધવાઓને નોકરી અથવા આજીવન ભથ્થું આપવા ટકોર કરી હતી
કોર્ટે ટીપ્પણી કરતા કહ્યું, “તમારે તેમને જીવનભર ટેકો આપવો પડશે. તમે તેનું જીવન સંપૂર્ણપણે બદલી નાખ્યું છે.”કોર્ટે ઓરેવા ગ્રૂપને વિધવાઓને નોકરી આપવા અથવા જો તેઓ નોકરી કરવા માંગતા ન હોય તો તેમને ભથ્થા ચૂકવવા જણાવ્યું હતું.
ચીફ જસ્ટિસ સુનિતા અગ્રવાલ અને જસ્ટિસ અનિરુદ્ધની ડિવિઝન બેંચ 30 ઑક્ટોબર, 2022ની ઘટનાની નોંધ લેતી PILની સુનાવણી કરી રહી હતી. બ્રિટિશ જમાનાનો સસ્પેન્શન બ્રિજ તૂટી પડતાં 135 લોકોએ જીવ ગુમાવ્યા હતા. સરકારના જણાવ્યા અનુસાર,આ ઘટનામાં દસ મહિલાઓ વિધવા થઈ અને સાત બાળકો અનાથ થયા છે.
કંપનીએ દલીલ કરતા જણાવ્યું હતું કે તે અનાથ અને વિધવાઓની સંભાળ લઈ રહી છે. હાઈકોર્ટ એ જાણવા માંગે છે કે તે વૃદ્ધ લોકો વિશે શું કરી રહી છે જેમણે પોતાના પુત્રો ગુમાવ્યા, જેના પર તેઓ નિર્ભર હતા. કોર્ટે કહ્યું, “જે વડીલો પોતાના પુત્રોની કમાણી પર નિર્ભર હતા તેમના માટે શું આધાર છે? તેમને આજીવન પેન્શન મળવું જોઈએ.”બેંચે કહ્યું, “એકસામટુ વળતર તેમને કામમાં આવશે નહીં. કૃપા કરીને આને ધ્યાનમાં રાખો. આ જીવન માટે એક ઘા છે. એક વખતનું વળતર કદાચ તેમને મદદ કરી શકે તેવી સ્થિતિમાં ન હોય…કંપની દ્વારા સતત ખર્ચ કરવો પડશે.”
જ્યારે કંપનીએ ફરિયાદ કરી કે પીડિતો સાથેના તેના કામમાં તેમની દુશ્મનાવટ અને પુરાવા સાથે ચેડા કરવાના આરોપોથી અવરોધ આવી રહ્યો છે, ત્યારે કોર્ટે તેને કલેક્ટર દ્વારા તેમનો સંપર્ક કરવાનો આદેશ આપ્યો હાઈકોર્ટે મોરબીના કલેક્ટરને કંપની સાથે સંકલન કરીને વર્તમાન પરિસ્થિતિ તેમજ પીડિતોના નજીકના સંબંધીઓની સ્થિતિ અને આર્થિક સ્થિતિ અંગેનો અહેવાલ રજૂ કરવાનો આદેશ આપ્યો હતો.
