ભારતમાં ઈન્ટરનેટ યુઝર્સની સંખ્યા ઝડપથી વધી રહી છે. ડિસેમ્બર 2021 સુધીમાં ભારતમાં 646 મિલિયન ઇન્ટરનેટ વપરાશકર્તાઓ હતા. ખાસ વાત એ છે કે ભારતમાં ગામડાઓમાં ઈન્ટરનેટનો ઉપયોગ કરનારા લોકોની સંખ્યા શહેરો કરતા 20 ટકા વધુ છે. એટલું જ નહીં છેલ્લા બે વર્ષમાં ઈન્ટરનેટનો ઉપયોગ કરતી મહિલાઓની સંખ્યામાં વધારો થવાનો દર પુરૂષો કરતા વધુ જોવા મળ્યો છે.
ડેટા અને માર્કેટ રિસર્ચ ફર્મ નિલ્સન દ્વારા ઈન્ડિયા 2.0 ઈન્ટરનેટ સ્ટડી નામના સર્વેમાં આ હકીકતો સામે આવી છે. કંપનીએ આ સર્વેક્ષણમાં દેશભરના 27,900 ઘરોના 110,000 સભ્યોને સામેલ કર્યા હતા. આ સર્વે સપ્ટેમ્બર 2021 થી ડિસેમ્બર 2021 દરમિયાન કરવામાં આવ્યો હતો. સર્વેના પરિણામો અનુસાર, ભારતની 60 ટકા ગ્રામીણ વસ્તી હજુ પણ ઈન્ટરનેટનો ઉપયોગ કરતી નથી. તે જ સમયે, 59 ટકા શહેરી વસ્તી ઇન્ટરનેટનો ઉપયોગ કરે છે. શહેરોમાં 294 મિલિયન સક્રિય ઇન્ટરનેટ વપરાશકર્તાઓ છે.
Livemint.comના એક અહેવાલ મુજબ, 12 વર્ષથી વધુ વયના સક્રિય ઇન્ટરનેટ વપરાશકર્તાઓની સંખ્યા હવે 592 મિલિયન સુધી પહોંચી ગઈ છે. 2019ની સરખામણીમાં તેમાં 37 ટકાનો વધારો થયો છે. ગ્રામીણ વિસ્તારોમાં સક્રિય વપરાશકર્તાઓમાં 45 ટકાનો વધારો થયો છે, જ્યારે શહેરોમાં તે 28 ટકા વધ્યો છે. છેલ્લા બે વર્ષમાં મહિલા ઈન્ટરનેટ યુઝર્સની સંખ્યામાં જબરદસ્ત વધારો થયો છે અને તેઓએ આ મામલે પુરુષોને પાછળ છોડી દીધા છે. બે વર્ષમાં ઈન્ટરનેટનો ઉપયોગ કરતી મહિલાઓની સંખ્યામાં 61 ટકાનો વધારો થયો છે, જ્યારે આ સમયગાળામાં પુરુષોની સંખ્યામાં માત્ર 24 ટકાનો વધારો થયો છે.
નીલસનના સર્વે અનુસાર, 90 ટકા યુઝર્સ દરરોજ ઈન્ટરનેટનો ઉપયોગ કરે છે. 50 વર્ષ કે તેથી વધુ વયના લોકો પણ ઈન્ટરનેટનો ઉપયોગ કરવામાં પાછળ નથી. સર્વેક્ષણમાં આ વય જૂથના 81 ટકા લોકોએ સ્વીકાર્યું કે તેઓ ઇન્ટરનેટનો ઉપયોગ કરે છે. દેશમાં ઈન્ટરનેટ ચલાવવા માટે મોબાઈલ ફોનનો સૌથી વધુ ઉપયોગ થઈ રહ્યો છે.
ભારતમાં ઈન્ટરનેટનો મહત્તમ ઉપયોગ સોશિયલ નેટવર્કિંગ અને ચેટિંગ માટે થાય છે. ઈન્ટરનેટના ટોપ 5 ઉપયોગોમાં વીડિયો જોવા અને ઓનલાઈન સંગીત સાંભળવું પણ સામેલ છે. ગામડાઓમાં ઈન્ટરનેટનો ઉપયોગ શહેરો કરતા 20 ટકા વધુ હોવા છતાં, શહેરી વસ્તી ઓનલાઈન બેંકિંગ અને ડિજિટલ પેમેન્ટની બાબતમાં ગામડાઓ કરતા આગળ છે. 20 થી 39 વર્ષની વયજૂથના બે તૃતીયાંશ શહેરી લોકો ઓનલાઈન બેંકિંગનો ઉપયોગ કરે છે.
