જામનગરમાં આવેલા હાપા માર્કેટિંગ યાર્ડમાં નવા અજમાની ધુમ આવક થઈ હતી. જેમાં આજે 20 કિલોના સૌથી વધારે ઉંચા ભાવ રૂપિયા 7 હજાર બોલાયા હતાં. જે અત્યારસુધીનો સૌથી ઉંચો ભાવ છે. ખેડૂતોને અજમાના ઉંચા ભાવો મળતા ખુશખુશાલ થયા હતાં.
હાપા માર્કેટિંગ યાર્ડના સેક્રેટરી હિતેશ પટેલે જણાવ્યું છે કે, આજે યાર્ડમાં 2 હજારથી વધું ગુણી અજમાની આવક થઈ રહી છે. દૈનિક બે હજાર જેટલી અજમાની ગુણી આવી રહી છે. ત્યારે આજે યાર્ડમાં નવા અજમાનો 20 કિલોનો ભાવ રૂપિયા 7 હજાર બોલાયો છે. ભાવનગર જિલ્લાના મહુવાના ડુંડાસ ગામના ખેડૂતો પોતાનો અજમો લઈને જામનગર યાર્ડમાં આવ્યાં હતાં. જેમાં એક મણનો ભાવ રૂપિયા 7 હજાર બોલાયો છે. સમગ્ર રાજ્યમાં અજમાનું મુખ્ય પીઠુ જામનગર યાર્ડ ગણાય છે. અજમાના ઈતિહાસમાં અત્યારસુધીમાં આટલો મોટો હાઈએસ્ટ ભાવ જોવા મળ્યો નથી.
