મુંબઈ, સોમવાર
સોમવારે ઐશ્વર્યા રાય બચ્ચન પનામા પેપર્સ કેસમાં ED સમક્ષ હાજર થઈ હતી. હવે એવા અહેવાલ છે કે નવેમ્બરમાં ED દ્વારા અભિષેક બચ્ચનની પૂછપરછ કરવામાં આવી હતી. આ પૂછપરછમાં અભિષેક બચ્ચને કેટલાક નાણાકીય વ્યવહારો વિશે જણાવ્યું હતું. આ વ્યવહારો હજુ તપાસ હેઠળ છે.
ઐશ્વર્યા રાય બચ્ચનને ED દ્વારા સમન્સ પાઠવવામાં આવ્યું હતું, ત્યારબાદ તે સોમવારે EDની ઓફિસ પહોંચી હતી. અહીં તેમની પનામા પેપર્સ લીક કેસમાં પૂછપરછ કરવામાં આવી હતી. ઐશ્વર્યાને અગાઉ બે વખત સમન્સ પાઠવવામાં આવ્યું હતું, પરંતુ બંને વખત તેણે નોટિસ મોકૂફ રાખવાની વિનંતી કરી હતી. પનામા પેપર્સ લીકની તપાસ કરી રહેલી સ્પેશિયલ ઈન્વેસ્ટિગેશન ટીમને ઐશ્વર્યાએ આ વિનંતી કરી હતી. EDએ ઐશ્વર્યાને ફેમા કેસમાં સમન્સ પાઠવ્યું હતું. આ સમન 9મી નવેમ્બરે બચ્ચન પરિવારના ઘરે મોકલવામાં આવ્યું હતું.તેનો જવાબ 15 દિવસમાં માંગવામાં આવ્યો હતો. ઐશ્વર્યાએ ઈમેલ દ્વારા ઈડીને જવાબ આપ્યો. પનામા પેપર્સ લીક કેસની તપાસ કરી રહેલી એસઆઈટીમાં ઈડી, ઈન્કમટેક્સ અને અન્ય એજન્સીઓ સામેલ છે.પનામા પેપર્સ લીક કેસમાં મોસાક ફોન્સેકા નામની કંપનીના કાનૂની દસ્તાવેજો લીક થયા હતા. આ ડેટા જર્મન અખબાર Süddeutsche Zeitung (SZ) દ્વારા 3 એપ્રિલ 2016ના રોજ પનામા પેપર્સ નામથી બહાર પાડવામાં આવ્યો હતો. તેમાં ભારત સહિત 200 દેશોના રાજકારણીઓ, ઉદ્યોગપતિઓ, સેલિબ્રિટીઓના નામ સામેલ હતા, જેમના પર મની લોન્ડરિંગનો આરોપ હતો. જેમાં 1977થી 2015ના અંત સુધીની માહિતી આપવામાં આવી હતી. આ યાદીમાં 300 ભારતીયોના નામ સામેલ છે. આમાં ઐશ્વર્યા ઉપરાંત અમિતાભ બચ્ચન, અજય દેવગનનું નામ પણ સામેલ હતું.
