આ શબ્દ થોડોક ભયાનક લાગશે પરંતુ વાસ્તવિક પરિસ્થિતિ ની ચર્ચા કરવી જરૂરી છે ત્યારે આજે આપણે મોરબી ના યુવાનો ના પ્લસ તેમજ માઇનસ પોઇન્ટ અને આદતો અને તેના સાથે ચાલતુ એક વિષચક્ર વિષે પ્રકાશ પાથરીશુ.

ઉદ્યોગ અને તેનો વિકાસ …
મોરબી નો સીરામીક ઉદ્યોગ તેમજ પેપરમીલ ,લેમીનટસ ,ઘડિયાળ અને પોલીપેક ના ઉદ્યોગ માં છેલ્લા બે દાયકા થી વિકાસ શરુ થયો જેમાં સીરામીક છેત્રે વિશ્વ નું બીજા નંબર નું ક્લસ્ટર બન્યું સાથોસાથ ભારત ના ઉત્પાદન માં ઘડિયાળ , પેપર , લેમિનેટ્સ અને પોલીપેક ઉદ્યોગ પણ નંબર 1 બનીને ગુજરાત નું ગૌરવ વધાર્યું ત્યારે આના માટે મહેનતુ વડીલો અને એજ્યુકેટેડ યુવા ઉદ્યોગકારો નો મહત્વનો સિંહ ફાળો રહ્યો છે . વિકાસ ની સાથે થોડીક કુટેવો આવે તે સ્વાભાવિક છે અને જો ધર્મ ની સાથે ના સંકળાય તો આ ખરાબી આવવાના ચાન્સ વધી જતા હોય છે અને આ મોરબી મા પણ થોડા ઘણા અંશે બન્યુ છે .

પરિવાર અને તેમાં આગામી સમયમાં ધ્યાન રાખવા જેવા મહત્વના મુદ્દાઓ…..
ઉદ્યોગ ના વિકાસ સાથે આર્થિક સારી એવી આવકના સ્ત્રોત ઉભા થતા યુવા ઉદ્યોગકારો વૈશ્વિક બન્યા અને પરિણામ સ્વરૂપે તેમની જરૂરિયાત કરતા વધુ આવક તેમજ તેની સાથે રોકડ ના ધંધા એ લાખો કરોડો રૂપિયા ના ટર્નઓવર માં વધુ પૈસા હાથ ઉપર આવતા પરિવાર માં પૈસા ની છત તેમજ જરૂર કરતા વધુ ખર્ચ અને સામાજિક દેખાદેખી નું વિકરાળ સ્વરૂપ પરિવાર માં જોવા મળ્યું .અને સમયાંતરે બહેનો ને ખર્ચ માં આઝાદી મળી જેમાં વિદેશ પ્રવાસ , સોનાની ખરીદી , મોંઘા બાઈક , મોંઘા બ્રાન્ડેડ કપડાં , ઘેર કામવારી , કસરત વગરનું જીવન , અને પૈસા થી જ પરિવાર ને ખુશ કરી શકાય તેવો ખોટો ભ્રમ ઉભો થાય તે સ્વાભાવિક છે .ત્યારે પરિવાર ફક્ત પૈસા થી ના ટકે તેના માટે સંસ્કાર , સારા વિચારો , બાળકો માટે સમય , અને વાર તહેવારે પરિવાર સાથે કિંમતી સમય આપવો વગેરે બાબતો માં થોડોક કાપ આવતો દેખાતો થયો ત્યારે યુવા વર્ગ માટે પરિવાર ની જવાબદારી અને વડીલો ની બાળકો પ્રત્યે ની સભાનતા બહુજ મહત્વનો ભાગ છે તે સમજવું બહુજ જરૂરી છે ત્યારે આવનાર સમયમાં આપણે જુદા જુદા વ્યક્તિઓ ના રોલ વિષે પ્રકાશ પાથરીએ …

યુવાનો અને તેમની આવડત અને કુટેવો …
વર્તમાન સ્થિતિ માં યુવાનો વૈશ્વિક બનીને અદ્યતન ટેક્નોલોજી સાથે વિશ્વ ના બીજા નંબર નું સીરામીક નું હબ બનાવવામાં વડીલો તેમજ યુવાનોએ મહત્વ નો ભાગ ભજવ્યો છે અને તેના માટે યુવાનો ને અભિનંદન આપવા તો ઘટેજ ..ત્યારે તેમની આવડત સાથે આવક માં સતત વધારો અને તેના કારણે તેમને મળેલ આઝાદી એ વિકાશ તો કર્યો પરંતુ અમુક કુટેવો પણ ઘર કરી ગયી તે પણ કડવી વાસ્તવિકતા છે ભલે આ ટકાવારી માં કદાચ નહિવત હશે પરંતુ આ વિશે ચર્ચા વિચારણા અને તેમાં પ્રકાશ પાથરવો જરૂરી છે .

આ કુટેવો માં મુખ્યત્વે શરાબ , નાના અંશે ડ્રગ્સ , સટ્ટો રમવાની કુટેવો, મહિલાઓ દ્વારા હનીટ્રેપ માં ફસાવવાનું વગેરે કુટેવો આવી અને એમાં ક્યાંય ને ક્યાંય એક ટાર્ગેટ સાથે આવા યુવાનો ને સોફ્ટ ટાર્ગેટ કરી ને ક્યાંય ને ક્યાંય ફસાવી ને તેને આવા રસ્તાએ લઇ જવા માટે મોટી એક ગેંગ કાર્યરત છે અને તે આવા યુવાનો ને ટાર્ગેટ કરીને તેમને તેમની તાકાત મુજબ ફસાવી અને ખંખેરવા નું મોટું ષડયંત્ર ચાલી રહ્યું છે અને તેમાં ઘણા બધા ફસાયા પણ છે . અને તેમાં ખાસ કરીને તેમને સટ્ટો રમાડવો અને ત્યારબાદ પૈસા ખંખેરવા અને તે પૂરું થાય એટલે તેને ઉંચા વ્યાજે પૈસા આપવા અને પછી દાદાગીરી કરીને તેની મિલકત પડાવવી અને કા તો તેને જિંદગી ટૂંકાવવા સિવાય રસ્તો જ નારહે ત્યાં સુધી પ્રેસર આપવું અને આ બધું પાછું પ્લાનિંગ સાથે થયી રહ્યું છે અને આ દરમ્યાન તે કા તો માનસિક રીતે આ બધુ સહન કરવા કોઈ પણ એક લત ના રવાડે પણ ચડી જાય છે ત્યારે આ બધી બાબતો માં યુવાનો એ બહુજ સાવચેતી રાખવી જરૂરી છે . અને દારૂ અને ડ્રગ ક્યાંય ને ક્યાંય બીજા વ્યસન માટે જતા હોય તે દુકાને પણ આજુબાજુમાં મળી જતા હોય છે અને એસપી રોડ અને બીજે ખુલ્લે આમ આવા લોકો પણ જોવા મળતા હોય છે ત્યારે આ બધી કુટેવો થી યુવાનો એ છૂટવું પડશે બાકી તો તેમની સાથે તેમનો પરિવાર પણ ડૂબશે અને બધાજ મુસીબત ના પર્વત નીચે આવી જશે

બહેનો અને માતાની જવાબદારી …
ખાસ કરીને આવી ખોટી આદત નો શિકાર જયારે યુવાન બને ત્યારે તેમાં તેના મિત્ર અને તેમના પત્ની ને સૌ પ્રથમ ખબર પડી જતી હોય છે ત્યારે તેમને તેમના પતિ ના મિત્ર સર્કલ માં કોણ છે , ઘેર સમયસર આવે , આવે ત્યારે તેમને કોઈ વ્યસન નથી કરેલ તે ચેક કરે , જો ક્યારેય એવું લાગે કે કઈ ગરબડ છે તો ડર્યા વગર તમારા અને તમારા પરિવાર ના ભવિષ્ય માટે તેના માતા ને જાણ કરો અને માતા તેમનો માતૃ પ્રેમ મૂકી ને કાંન આમળીને કહે કે ખબરદાર જો હવે ક્યારેય આ રીતે આવ્યો છો તો . ત્યારે ૧૦૦% તે શરૂઆત ના દિવસોમા પાછા વળી જશે બાકી એક વાર જો આદત લાગી ગયી તો તમારી અને તેની બંને ની આખી જિંદગી બગડી જશે અને પરિવાર પણ આર્થિક રીતે ખતમ થયી જશે . ત્યારે આવી વસ્તુ છુપાવવા યુવાનો પણ પોતાની પત્ની ઓ ને બધાજ ખર્ચ કરવા પૈસા આપી દેતા હોય છે ત્યારે તેરી ભી ચૂપ મેરી ભી ચૂપ ના બદલે બહેનો એ આવી કોઈ પણ પૃવૃત્તિ કરતા હોય તેમના પતિદેવ તો તેનો વિરોધ કરવો જોઈએ જે તેના અને તેના પરિવાર માટે મહત્વનું છે.

પિતાની જવાબદારી ……
પોતાનું સંતાન પૈસા ગમે તેટલા કમાય તો પણ તેનામાં કુટેવ ના આવે તે જોવાની જવાબદારી પિતાની છે . ઘેર સમયસર આવે , આવે પછી તે પરિવાર સાથે બેસે , તેનું મિત્ર સર્કલ કેવું છે તે જોવે , તે કોઈના શિકાર નો ભોગ ના બને તે જોતા રહે , સમયસર તેમના મિત્રો ની પણ તપાસ કરે , અને તે ગમે તેટલા કમાતો હોય તો પણ તેને પરિવાર ના રૂલ્સ નું પાલન કરે અને આડા રસ્તે ના જાય તેનું ધ્યાન રાખે , તેમના ખર્ચ અને આવક નું પણ ધ્યાન રાખે અને છેલ્લે તેને મિત્ર તરીકે તેને કઈ પણ તકલીફ આવે તો તે ખુલ્લા મને બાપ ને કહી શકે તેટલી આત્મીયતા કેળવે અને જો ભૂલ થી પણ કઈ ભૂખ થયી હોય તો કાયદાકીય સહારો લઇ ને તેને એ રીતે તેમાંથી બહાર લાવે જેથી કરીને તેનું સંતાન અને તેનો પરિવાર શાંતિ થી રહી શકે અને તે માટે જરૂર પડે ત્યારે લાલ આંખ પણ કરવાની માનસિકતા રાખે , અને ખાસ કરીને ફક્ત પૈસા સારા કમાઈ ને લાવે છે એટલે તેને જેમ કરવું હોય તેમ છૂટ આ માનસિકતા માંથી બહાર લાવવવાની જવાબદારી પિતા ની હોય છે અને પોતાના સંતાન ની દરેક ગતિવિધિ નું જ્ઞાન રાખે તેની સિક્યુરિટી નથી કરવાની પરંતુ તે શુ કરે છે , ક્યાં જાય છે , કોની સાથે બેસે છે , અને ખાસ કરીને ઘેર પણ ધંધા ઉપરથી સમયસર આવે તે તમામ જવાબદારી પિતાની હોય છે ત્યારે વડીલો ને પણ આ બાબતે સાવચેત થવું બહુજ જરૂરી છે .

આગેવાનો અને તંત્ર ની જવાબદારી…
સમાજ ના આગેવાનો અને વડીલો ને જયારે પણ કોઈ બાળક વિષે સમાચાર મળે તો તેની તાપસ કરી ને તમને પરિવાર સુધી આ મેસેજ પહોંચાડવો જરૂરી છે અને ખાસ કરીને આવી કોઈ પણ પ્રવુતિ ધ્યાન માં આવે તો સમાજ ના આગેવાનો અને સામાજિક કાર્યકરો એ તંત્ર ને પણ જાણ કરીને આવી બધીજ પ્રવુતિ બંધ થાય તે માટે રાજકીય આગેવાનો , પોલીસ , અને કલેકટર સુધી જાણ કરીને આવી પ્રવુતિ બંધ કરાવવી જરૂરી છે નહીંતર આજે કદાચ તે બીજા નું બાળક હશે પરંતુ આ સડો આપણા ઘર સુધી પણ પહોંચી શકે છે ત્યારે અંત માં આવા જે પણ જગ્યા હોય ત્યાં પોલીસ તંત્ર પણ આવી પ્રવુતિ ને બંધ કરવા કડક પગલાં ભરે અને ડ્રગ્સ , દારૂ , સટ્ટો , હનીટ્રેપ , અને ઊંચા વ્યાજ વારા લોકો ઉપર કડક પગલાં ભરી મોરબી ને ઉડતા મોરબી બનતા અટકાવે તે જરૂરી છે . અને હા મોરબી ના યુવાનો મા સારા ગુણો ની ટકાવારી વધુ છે અને હજુ કુટેવો હોય તેવૂ ટકાવારી માં બહુ કઈ નથી એટલે જાગ્યા ત્યારથી સવાર આવો સાથે મળી ને મોરબી ને બીજા શહેર માં લાગેલ બદીઓથી બચાવીએ અને ભારત ના વિકાસ માં મોરબી ના યુવાનો ને પણ જોડીએ.