મોરબીના શક્ત સનાળા નવા પ્લોટ વિસ્તારમાં રહેતી 55 વર્ષીય વૃદ્ધા પર તેમના જ દીકરાના સાળાએ લાકડાના ધોકા વડે હુમલો કરી ગંભીર ઈજાઓ પહોંચાડ્યાની ફરિયાદ મોરબી સિટી એ-ડિવિઝન પોલીસ મથકમાં નોંધાઈ છે.
ફરિયાદી નંદુબેન છગનભાઈ સોલંકીએ ભડીયાદ ગામના લલીતભાઈ ખેંગારભાઈ ઉભડીયા વિરુદ્ધ ફરિયાદ નોંધાવી છે. ફરિયાદ મુજબ આરોપીએ નંદુબેનને તેમની બહેનને કેમ હેરાન કરો છો તેમ કહી ગાળો આપી હતી. ત્યારબાદ ઉશ્કેરાઈને લાકડાના ધોકાથી તેમના બંને પગ તેમજ વાસાના ભાગે માર માર્યો હતો.
હુમલા બાદ આરોપીએ નંદુબેનને જાનથી મારી નાખવાની ધમકી આપી હોવાનો પણ ફરિયાદમાં ઉલ્લેખ કરવામાં આવ્યો છે. સમગ્ર મામલે મોરબી સિટી એ-ડિવિઝન પોલીસે ફરિયાદના આધારે ગુનો નોંધી આરોપી સામે કાયદેસરની કાર્યવાહી હાથ ધરી છે.
