આગામી શૈક્ષણિક સત્ર એટલે કે 2023-24 સત્રથી યુનિવર્સિટીઓમાં 4 વર્ષના સ્નાતક એટલે કે અંડરગ્રેજ્યુએટ ડિગ્રી કોર્સ શરૂ થશે. આ અંગે UGC દ્વારા તૈયારીઓ શરૂ કરી દેવામાં આવી છે. આ માટે યુનિવર્સિટી ગ્રાન્ટ કમિશન-UGCએ માર્ગદર્શિકાને અંતિમ સ્વરૂપ આપી દીધું છે. આ મહિનાના અંત સુધીમાં યુજીસી દ્વારા તૈયાર કરવામાં આવેલી માર્ગદર્શિકા તમામ યુનિવર્સિટીઓ સાથે શેર કરવામાં આવશે.
યુનિવર્સિટીઓમાં 4-વર્ષના સ્નાતક એટલે કે અંડરગ્રેજ્યુએટ ડિગ્રી કોર્સની રજૂઆત એ નવી રાષ્ટ્રીય શિક્ષણ નીતિનો એક ભાગ છે અને રાષ્ટ્રીય શિક્ષણ નીતિમાં સમાવિષ્ટ મુદ્દાઓને ઉચ્ચ શૈક્ષણિક સંસ્થાઓમાં તબક્કાવાર રીતે લાગુ કરવામાં આવી રહ્યા છે.
શૈક્ષણિક સત્ર 2023-24થી તમામ નવા વિદ્યાર્થીઓ પાસે 4 વર્ષના અંડરગ્રેજ્યુએટ કોર્સમાં પ્રવેશ લેવાનો વિકલ્પ હશે. આ સિવાય જૂના વિદ્યાર્થીઓ માટે 4 વર્ષના અંડરગ્રેજ્યુએટ કોર્સની સ્કીમને પણ મંજૂરી મળી શકે છે. આ અંગે યુજીસી દ્વારા ગાઈડલાઈન જાહેર કરાયા બાદ પણ સ્થિતિ સ્પષ્ટ થશે.
જે વિદ્યાર્થીઓએ આ વર્ષે સામાન્ય 3-વર્ષના અંડરગ્રેજ્યુએટ અભ્યાસક્રમોમાં પ્રવેશ મેળવ્યો છે તેઓને પણ આગામી સત્રથી 4-વર્ષના ડિગ્રી કોર્સમાં જોડાવાની તક મળી શકે છે.
