ભારતીય ક્રિકેટ ટીમ દ્વારા પ્રથમવાર વિશ્વ કપ વિજેતા ટીમ પર ફિલ્મ બની છે. જેમાં બોલિવૂડ સ્ટાર એક્ટર રણવીર સિંહે અભિનય કર્યો છે દર્શકો ફિલ્મ ’83’ની આતુરતાથી રાહ જોઈ રહ્યા છે. હવે આ ફિલ્મ તારીખ 24મી ડિસેમ્બેર રિલીઝ થવા જઈ રહી છે. ત્યારે એક રિપોર્ટથી એવું જાણવા મળ્યું છે કે ફિલ્મ ’83’ માટે રણવીર સિંહે 20 કરોડ રૂપિયા ફી લીધી છે. આ સાથે એવું પણ જણાવાયું છે કે રણવીર સિંહને ફિલ્મનો પ્રોફિટ શેર પણ આપવામાં આવશે.
એક એન્ટરટેઈનમેન્ટ વેબ પોર્ટલના સૂત્રોના જણાવ્યા મુજબ, બોક્સ ઓફિસ પર સફળતાના મામલે રણવીર સિંહ ઝડપથી સ્ટાર બની ગયો છે. રણવીર સિંહનો હિટ ફિલ્મ્સનો રેકોર્ડ અને વધી રહેલી ફેન ફોલોઈંગને જોતાં તે વાતમાં સહેજ પણ આશ્ચર્ય નથી કે ફિલ્મ ’83’ માટે રણવીર સિંહ ડબલ-ફિગરમાં ચાર્જ કરશે. ફિલ્મ ’83’ માટે રણવીર સિંહે મેકર્સ પાસેથી 20 કરોડ રૂપિયા ફી લીધી છે. રિપોર્ટથી વધુમાં જણાવ્યા મુજબ, રણવીર સિંહે ’83’ માટે 20 કરોડ રૂપિયાની ફી સહિત ફિલ્મના પ્રોફિટમાં પણ હિસ્સો માગ્યો છે. પરંતુ, રણવીર સિંહનો હિસ્સો કેટલો હશે તેની જાણકારી હજુ સુધી જાણવા મળી નથી. એવું જણાવાઈ રહ્યું છે કે ફિલ્મ ’83’ રિલીઝ થયા પછી આ રકમ વિશે જાણવા મળશે.
ઉલ્લેખનીય છે કે ’83’માં રણવીર સિંહ કપિલ દેવના રોલમાં છે, જ્યારે દીપિકા પાદુકોણ કપિલ દેવના પત્ની રોમી ભાટિયાના રોલમાં જોવા મળશે. 3.49 મિનિટના આ ટ્રેલરમાં રણવીર સિંહ અને દીપિકાના સીન્સને લોકો ખૂબ પસંદ કરી રહ્યા છે. ફિલ્મ ’83’માં તાહિર રાજ ભસીન, પંકજ ત્રિપાઠી, સાકિબ સલીમ, જતિન સરના, હાર્ડી સંધુ, એમી વર્કિ, સાહિલ ખટ્ટર અને આર બદ્રી જેવા સ્ટાર્સ જોવા મળશે. આ ફિલ્મ હિન્દી સિવાય તમિલ, તેલુગુ, મલયાલમ અને કન્નડ ભાષામાં 24મી ડિસેમ્બરના રોજ રીલિઝ કરવામાં આવશે.
વિશ્વની સૌથી ઊંચી ઈમારત બુર્જ ખલીફા પર ફિલ્મ ’83’નું ટ્રેલર બતાવાયું હતું. આ જોઈને દીપિકા અને રણવીર સહિત ફિલ્મની આખી ટીમ ખૂબ ઉત્સાહિત જોવા મળી હતી. પૂર્વ ક્રિકેટર કપિલ દેવ પણ આ દરમિયાન ત્યાં હાજર હતા. પતિની ફિલ્મનું ટ્રેલર જોઈને દીપિકાની ખુશીનું ઠેકાણું નહોતું અને આ ક્ષણ તેના માટે ગર્વની હતી. 1983ના ક્રિકેટ વર્લ્ડ કપની ઐતિહાસિક જીત પર આધારિત આ ફિલ્મમાં રણવીર એ વખતના ટીમ ઈન્ડિયાના કેપ્ટન કપિલ દેવના રોલમાં છે. દીપિકા આ ફિલ્મની કો-પ્રોડ્યુસર પણ છે.
